Antolakuntzak azken prestaketak egiten jarraitzen du larunbaterako. Lasterketaren 17. edizioak 650 korrikalari baino gehiago elkartuko ditu, eta dena prest egon dadin, ezinbestekoa da azken egunotan egiten ari den lana.

Lasterketa bat antolatzea ez da soilik korrikalariak irteeran jartzea. Ibilbideak prestatu, segurtasuna bermatu, anoa guneak antolatu, zerbitzuak koordinatu eta lasterketaren eguna behar bezala garatu ahal izateko, pertsona eta eragile ugariren lana dago atzean.

Hala, Flysch Trailaren atzean, antolakuntzaz gain, boluntario, lur-jabe, baserritar eta hainbat erakunderen lankidetza dago. Haien laguntzari esker, lasterketaren ibilbideak eta gainerako zerbitzuak behar bezala prestatu ahal dira.

Aurten, gainera, 225 boluntario inguruk hartuko dute parte lasterketaren antolaketan. Haien lana ezinbestekoa izango da korrikalariak laguntzeko eta larunbateko jardunaldia normaltasunez garatzeko.

Antolakuntzatik gogorarazi dutenez, Flysch Trail ez da soilik kirol proba bat, baizik eta jende askoren elkarlanari esker urtez urte aurrera ateratzen den ekimena. Larunbatean, beraz, korrikalariak izango dira protagonista, baina haien atzetik lan egingo duten dozenaka pertsona ere izango dira lasterketaren ezinbesteko parte.

Etiketak: , , , , , , , , ,