Medina eta Hernandez, 14 kilometroko Flysch Traileko irabazleak
Asier Medina eta Ania Hernandez izan dira gaur, larunbata, jokatutako Zumaia Flysch Trailaren 14 kilometroko probako irabazleak. Medinak 1:00:17ko denboran osatu du ibilbidea, eta Hernandezek 1:06:50 behar izan ditu helmugara iristeko.
14 kilometroko probako korrikalariek Zumaiako eta inguruko mendiko bideak eta flyscharen inguruko paisaiak zeharkatu dituzte. Ibilbidean Santa Klarako igoera nabarmendu da, eta proba Elorriagaraino iritsi da, handik Zumaia aldera itzultzeko.
Medina getariarra izan da gizonezkoen sailkapeneko lehenengoa, Abantaila txikia mantendu du lasterketa guztian, eta bere denbora helmugan, 1:00:17 izan da. Bigarren sailkatua Jokin Gijarro zumaiarra izan da, 1:01:55 denborarekin, eta hirugarren, Getariako Aimar Iraola 1:02:15 denborarekin.
Emakumezkoetan, berriz, Hernandez gasteiztarra izan da azkarrena, 1:06:50ko denborarekin. Bigarren sailkatua ia hiru minututara iritsi da, Garazi Artola zumaiarra izan da bigarren postuan, 1:09:17ko denborarekin. Hirugarren postua, berriz, Jule Olaizola zumaiarrarentzat izan da, 1:09:35ko denborarekin.
Giro berezia Zumaian
14 kilometroko probako korrikalariek ere 17. edizio berezi batean hartu dute parte. Izan ere, aurten Zumaia Flysch Trail lehen aldiz larunbatez egin da, eta aldaketak lasterketaren inguruan sortutako giroan ere izan du eragina. Korrikalariez gain, herritar ugari hurbildu dira ibilbideko hainbat puntutara eta helmugara lasterketa zuzenean jarraitzera.
Bi distantzietako 650 parte-hartzaile baino gehiago izan dira guztira, eta aurtengo edizioak emakumeen parte-hartzearen errekorra ere ezarri du: izena eman dutenen %45 emakumeak izan dira.
Edizio honetan ingurumenari lotutako neurriak ere mantendu dira. Anoa-guneetan ez da edalontzi erabilgarririk erabili, eta korrikalariek beren ontzia eraman behar izan dute edateko. 14 kilometroko proban hiru anoa-gune izan dituzte parte-hartzaileek Elorriagan eta San Telmo ermitaren inguruan, eta helmugan ere azken anoa-gunea izan dute.
Lasterketaren amaieran, Beheko plaza izan da protagonista. Korrikalariek eta boluntarioek jan-edanaz eta festa giroaz gozatu ahal izan dute, kirol jardunaldiari amaiera kolektiboa emanez. Guztira, 225 boluntario inguruk parte hartu dute lasterketaren antolaketan, ibilbideak, anoa-guneak eta gainerako zerbitzuak behar bezala prestatu eta eguna normaltasunez garatzeko.
Horrela amaitu da aurtengo Zumaia Flysch Trail, kirola, flyscharen paisaia eta herri giroa beste behin uztartuz.
